رام الله/ تبرع بسام زكارنة رئيس نقابة الموظفين العموميين بدفع 5 شواكل ( دولار ونصف) عن راتب كل موظف لصالح وزارة التربية والتعليم العالي ، ( مش راكبة)
أخذ بسام زكارنة قرارا نيابة عن موظفي السلطة الوطنية ، بدعم وزارة التربية والتعليم العالي بمبلغ 5 شواكل من كل موظف ( كمان مش راكبة ).
بسام زكارنة يقدم دعماً نيابة عن كل موظف بدفع مبلغ 5 شواكل من راتبه ( مش مهم ) المهم انفهمت القصة.
أثار قرار او تبرع أو دعم بسام زكارنة ، موجة كبيرة من السخرية ، والسخط من قبل موظفي السلطة الوطنية ، عبّر بعضهم عن هذا السخط على صفحاتهم الخاصة ” الفيس بوك” فيما نطق أخرون وبتصريحات واضحة وصريحة .
من جهته (أمد) رصد تعليقات بعض الموظفين :
وائل البرغوثي
” زمان كانوا يحكولنا فلان مثل ابن الخريفة يعني ابن الخريفة الي بولد وبكبر بسرعة وبصير فارس لا يشق له غبار، وانت يا بسام مثل ابن الخريفة ولدت وكبرت في يوم وليلة ولسا بدك تكبر على ظهور الموظفين كمان وكمان. ويا خوفي بكرة تصير تحدد الهم وقت المعاشرة الزوجية ووقت الانجاب. اه وليش لأ؟ مش انت ابن الخريفة”.
سامر الاحمد
“رئيس الموظفين وولي امرهم ( بما انهم مراهقين وفش عندهم القدره على اتخاذ القرار )
اولا :_ حضرتك مش وطني وحريص على الوطن اكتر من اي موظف ؟!
ثانيا :_ الي بده يعمل فيها حاتم الطائي المفروض اكون من ماله الخاص او بسال الناس بالاول
ثالثا :_ شي مخجل تقارن على صفحتك تصرفك بتصرف الاحتلال برفع شيقل للمحروقات
رابعا :_ ما تحمل الموظفين جميله بالزياده لانه واجبك من اكنر من سنه وحضرتك بتماطل فيه باللجان التشاوريه الي بتشكل فيها مع الحكومات
خامسا :_ كل مؤسسات الوطن عندهم مشاكلهم الخاصه وما بصير تعمل فيها مصلح اجتماعي . والموظفين عندهم مليون مشكله من رواتب لهيكليه لزياده لغلاء معيشه ….. الخ
سادسا :_ بما انك بتحكي عن الاصلاح والمثاليه في المؤسسات مش ملاحظ انه الجسم الاداري للنقابه طول زي الحكام العرب وزياده شوي ..”.
اياد اسعد ابوزنط
“اخ بسام ممكن ترد على السؤال…… هل عملك بالنقابه جعلك وصي على رقاب الموظفين ولقمة عيشهم وتتصرف كما انت ترى وكان الموظفين قطيع نعاج تسوقه كيفما تشاء؟!!!!!!! جاوب يا سيد بسام عشان العالم ترتاح مش اكتر… والقضيه مبدئيه ومش على شان ال 5 شيكل “.
Yousef Fadel
“اخ بسام زكارنه انا كموظف لم اخولك ان تخصم براتبي لمين ما بدك وايمتى ما بدك وكيف ما بدك ،،، انا مش اغنى من الحكومه ماشي. وبدل ما تناقض بحالك ومره بتعمل اضراب هون وهناك بسبب انه غلاء ومعيشه وفش رواتب ،، ما بعرف كيف بتتبرع برواتبنا انا ضد هاد. الشي بدون اخذ. موافقتي انت مش رئيس نقابه لتتبرع ع حسابنا اتبرع براتبك لحالك”.
عبدالهادي زيتاوي
سيد بسام زكارنه:
“جيد أن تحل مشاكل الجامعات ولكن من خلال الحكومة التي تتحمل المسئولية الأولى والأخيرة في دعم الجامعات وليس من خلال الموظفين وكذلك يتم حل المشكلة من خلال خطة وطنية تشمل القطاعين العام والخاص يشارك به الموظفين بنسبة معينة ومن خلال خطة انقاذ وطنية محددة الأجل وليست مفتوحة كما هو هذا القرار فأين دور السلطة الغائبة والحكونة المتغافلة عن المشكلة ووزارة التعليم العالي التي تنكث بوعودها للجامعات وهل هذا الاقتراح يحل أزمة الجامعات المتراكمة منذ سنوات وهل كلما مرت الجامعات بأزمة مالية ستلجأ لجيوبنا ورواتبنا المتآكلة والهزيلة أصلا وهل ستلتزم الجامعات بعدم رفع الأقساط في السنوات القادمة وهل سيبقى هذا القرار ساري المفعول إلى أجل غير معلوم وهل ستعيد الجامعات فرق الأقساط التي رفعت خلال هذا الفصل؟ وهل سيساهم الجميع بنفس النسبة فالمراسل والآذن المسكين الذي يتقاضى أقل من ألفي شيكل سيساهم بنفس النسبة التي سيساهم بها رئيس الحكومة والوزير وكبار الموظفين فهل هذا من العدل؟؟؟؟؟؟؟!!! بقي أن أذكرك سيد بسام زكارنة أن معظم طلبة الجامعات هم من أبناء الموظفين الذين يلتزمون بدفع الأقساط ويتأثرون بكل عملية رفع للأقساط وكل عملية إضراب في الجامعات فبهذا القرار يكون حل المشكلة على حساب الآباء مرة عند تسديد الأقساط سواء ارتفعت أو بقيت على حالها ومرة أخرى عند التبرع لحل مشكلة الجامعات المالية.”
هيثم العجرمي
“انتا باي حق بدك تخصم 5 شواكل من كل موظف خير انشاء الله عنجد انة ما في قانون ولو في قانون كان الي زيك ما بيسترجي يجيب سيرة رواتب الموظفين استحي على حالك وسيبك من بيع المواقف على حساب الغلابة”.
Ayoub Hleeqawi
“لكن ال 5 شواقل بتتبرع فيهم من جيبة ” ابوك” الله يرحمه اذا متوفي والله يخليه الك اذا عايش…. انا كموظف مش مستعد اتبرع بتعريفه للحكومة او عن كاهلها ولصالح الخصخصة. وبعدين حكومة فيها كل هذا الفساد وسوء الادارة للمال العام انت مستعد تقف الى جانبها؟؟؟؟؟؟؟ حكومة بتسرق من شواقلك ومن راتبك المتاكل مستعد تساهم في وضع حلول لها؟؟؟؟؟؟؟؟ حكومة بتناقش فيك على 15 شيكل غلاء معيشة من سنة وبتحاول تسرقهم بتحاول تقدم الها مخارج؟؟؟ …..”.
ليبق السؤال موحداً وموجهاً الى مجلس إدارة نقابة الموظفين ، التي سكتت عن قرار بسام زكارنة ، وخولته بأن يدفع ويمنع كما يشاء من رواتب الموظفين ، بعد أن فشل بعديد من الملفات الخاصة بالموظفين لا حصر لطرحها ، وأهمها علاوة المعيشة ، ومستحقات الموظفين واستحقاقتهم بدرجاتهم الوظيفية والفروقات المالية ، وبمكافأت أخر المدة للمتقاعدين العسكريين ، ومتفرغي 2005 وما فوق ، ومستحقات الأسرى وأسر الشهداء ، وبحر من المشاكل العالقة ، فبدلاً من أن يعمل زكارنة على حلها ، تبرع حضرته بخصم جزء من رواتب الموظفين لصالح جهة حكومية لها برنامجها وموازنتها السنوية وخططها الوطنية .
وأن من الحق أن يحول بسام زكارنة ومجلس إدارة نقابة الموطفين الى مساءلة قانونية من قبل المجلس التشريعي ، رغم توقف أعماله بسبب الانقسام ، ولكن الأمر يستحق المساءلة ، لأن أموال الموظفين ليست مالاً سائباً يحق لزكارنة وسواه أن يتصرف بها.
أمد.
